මේ වසර සඳහා වූ ඇපල් සමාගමේ මෘදුකාංග සංවර්ධක සමුළුව ජුනි 4 වන දා එම සමාගමේ ප්‍රධාන විධායක නිලධාරී ටිම් කුක්ගේ ප්‍රධානත්වයෙන් පැවැත්වුණා. එහිදී ඔවුන් අලුතෙන් හඳුන්වා දෙන නිෂ්පාදන යාවත්කාලීනයන් සහ දෘඪාංග පිළිබඳව හඳුන්වා දෙනු ලැබූ අතර හැම කෙනෙක්ම පුල පුලා බලා සිටි iOS12 නිකුතුව ද එදින එළිදක්වනු ලැබුවා. මේ, එම අවස්ථාවේදී හඳුන්වාදුන් අපූර්වතම දේවල් කිහිපයක්.
නවතම මෙහෙයුම් පද්ධතිය: iOS12
දුරකතන භාවිතයට ඇබ්බැහි වීම වළකාලීම පොදු ප්‍රශ්නයක්ව ගොඩ නැගෙද්දී ඒ වෙනුවෙන් දුරකතනය හරහාම සහාය දක්වමින් ඇප් එකක් භාවිත කිරීමට වැය කරන කාලය සීමා කිරීම සඳහා අවස්ථාව සලසා දෙනවා. ඇන්ඩ්‍රොයිඩ් P සඳහා ද මෙවන් ආකාරයේ පහසුකමක් අඩංගු කරන ලද අතර iOSහි එම විශේෂාංගය digital health dashboard ලෙස හඳුන්වනවා. එහි ඇති විශේෂත්වය නම් ඇප් එකකට ඔබ සැකසූ වේලාව අවසන් වන විට notification එකකින් එය පෙන්වා, අවශ්‍ය නම් එළාම් එක මෙන් කාලය මඳකින් දීර්ඝ කර ගැනීමට අවස්ථාව ලබාදී තිබීමයි. නිදාගන්නට පෙර Do not Disturb mode එක සක්‍රීය කරන්නට, අගුළු තිරයේ Notifications ගොඩ ගැසීම වළක්වමින් ඒවා group කරන්නට, දරුවන්ට දුරකතනය දීමට පෙර භාවිතය සීමා කරන්නට නව මෙහෙයුම් පද්ධති වෙළුමේ වැඩිදුරටත් අවකාශ සලසා තිබෙනවා.
Memoji නමින් Animoji
සැම්සන්ග් සමාගම ඇපල් සමාගමෙන් උපුටා ගැනීම් කළ බවට චෝදනා ලබමින් තම S9 දුරකතන සමඟ හඳුන්වාදෙනු දකින්නට ලැබුණු AR emoji හෙවත් Animoji (චලනය වන emoji) ඇපල් සඳහා Memoji නමින් හඳුන්වා දුන්නා. අපේ මුහුණ හඳුනාගෙන එයට අදාලව නව emoji මින් සැකසෙනවා. මෙහි ඇති විශේෂත්වය නම් දිව ඇදීම ද ඊට හඳුනාගත හැකි වීමයි. Messages සඳහා ඊට සමගාමීව ඇප් කැමරාවට ස්ටිකර් සහ drawing tool එකක් ද ඇති අතර FaceTime සඳහා දැන් මිතුරන් 32ක් සමඟ ඇමතුම් ගන්නට පුළුවන්. වීඩියෝ කෝල්වලදී තමන්ගේ මුහුණ වෙනුවට Memoji එකක් යොදන්නටත් පුළුවන්.
macOS : Mojave
උතුරු ඇමරිකාවේ මොහාවී කාන්තාරය (Mojave desert) සිහි කරමින් මෙම නම නවතම macOS එකට යොදා තිබෙනවා. මෙහි dark theme එකක් ඇති නිසා රාත්‍රී කාලයේදී ඇසට පහසු ලෙස භාවිත කළ හැකි සේ තිර අංග කළු පැහැ ගැන්වෙන අතර XCode සඳහා inverted (ප්‍රතිවිරුද්ධ කළ වර්ණ) ලැබෙනවා. ෆේස්බුක් ලයික් සහ කමෙන්ට් plugins වෙබ් අඩවිවල යෙදීමෙන් ඔබව track කිරීම් සිදුවන නිසා ඒවා වළක්වන්නට Safari වෙබ් බ්‍රවුසරය කටයුතු කරනවා. ඔබට අවශ්‍ය නම් ඔබේ දත්ත රැස් කරන්නට ඉඩ සලසන්නටත් පුළුවන්. වෙබ් අඩවිවලට ඔබේ පරිගණකය පිළිබඳව අවම තොරතුරු ප්‍රමාණයක් ලබාදෙමින් වෙළඳ දැන්වීම් වලට පරිගණකයේ අනන්‍යතාව හඳුනාගැනීමට ඇති ඉඩකඩ ද නැති කරනු ලබනවා.
WatchOS 5
Fitness ඇප්ස් සහ උපාංගවල බහුලව දකින්නට ලැබෙන විශේෂාංගයක් වන යහළුවන් සමඟ තරග කරමින් ශරීර සුවතාවේ යෙදීම සහ ලකුණු රැස් කිරීම WatchOS 5 සඳහාත් ලැබෙනවා. එහිදී ඔබ ජයග්‍රහණයන් ලබා ගනිද්දී ඊට ඩිජිටල් දීමනාවන් ද දිනාගන්නට පුළුවන්. ඔරලෝසුවටත් දැන් WebKit එක්වන නිසා කුඩා තිරය මත වුවත් ඒ වෙනුවෙන් සකසන ලද වෙබ් පිටුවක් ඔබට බැලීමට අවස්ථාව ලැබෙනවා. Podcast සඳහා සහාය, Siri සමඟ වඩාත් හොඳින් ක්‍රියා කිරීම, ක්‍රියා යෝජනා (action suggestions) ලැබීම, වෝකි-ටෝකි එකක මෙන් මිතුරන්ගෙන් voice message ලැබිය හැකි වීම ආදී දේවල් අලුත් ඔරලෝසු මෙහෙයුම් පද්ධතිය සතුයි.
අනිත් අයටත් දැනගන්න Share කරන්න ...
